13 De regione Transtiberim
De Transtiberim, tertia decima et ultima regione urbis, est sciendum quod ordo regionum huiusmodi ordine retrogrado conputatur. Et est ratio quia Roma habet formam leonis, ut inferius proprio capitulo clarius [287] ostendetur.
13, 2 Sed incole huiusmodi regionis deferunt in ipsorum vexillo campi rubei caput leonis coloris aurei ad docendum et insinuandum quod a capite est derivanda virtus in menbris corporis animati [288]; ita huiusmodi regio, inspecta urbis forma sub qua est figuratum caput leonis, deberet prima [289] in ordine conputari et ceteris regionibus anteponi predictis.
13, 3 Patet etiam clarius quia Ianus Iaphet filius [290] ibidem primo manseolum et civitatem que dicebatur Ravenna construxit, id est ripa vel portus venientium navium ad urbem per mare ad Tiberim Romanum, sed ab olim Albula Tyber huiusmodi dicebatur, secundum Eutropium [291] (cf. Paul. Diac. hist. Rom. 1, pr.), ut patet supra de conditoribus urbis eiusdem [292].
13, 4 Transtiberim dicitur quasi transitus Tyberis per pontem, ideo dictum quia pedes omnium transeuntium per eum tenet et sustinet. Et hec de nominibus regionum urbis pauca in presenti dixisse sufficiat.
